Sóley Margrét varði Evrópumeistaratitilinn í U18
Sóley Margrét Jónsdóttir kom sá og sigraði á Evrópumótinu í kraftlyftingum í Pilsen í Tékklandi. Ekki aðeins varði hún Evrópumeistaratitil sinn í stúlknaflokki, í +84 kg flokki, heldur setti hún nýtt Evrópumet.
Sóley sem er 16 ára tók gullið í hnébeygju þegar hún lyfti 232,5 kg í hnébeygju í þriðju tilraun, sem er nýtt Evrópumet í stúlknaflokki 14-18 ára. Gullið fékk hún einnig í bekkpressu þegar hún lyfti 115 kg og í réttstöðulyftunni þegar 200 kg fóru á loft. Þar með lyfti hún samtals 547,5 kg, sem er hennar besti árangur, og varð Evrópumeistari annað árið í röð. Sóley setti samanlagt 14 Íslandsmet, 3 Norðurlandamet og 1 Evrópumet á Evrópumeistaramótinu í Pilzen sem er glæsilegur árangur.
Samkvæmt Grétari Skúla formanni KFA er mikil stemning í hópnum í Pilsen en Kara Gautadóttir keppti í gær og stóð sig vel. Karl Anton Löve keppir svo í dag en hann er barnabarn Jóhannes Hjálmarsson og er einn af okkar sterkustu unglingum á Akureyri í dag. Hulda Björk Waage og Viktor Samúelsson eru svo að keppa á fös/laug.
Þeir sem vilja fylgjast með okkar fólki úr KFA á Evrópumótinu í Pilsen geta farið inná FB síðu KFA: https://www.facebook.com/kfakureyri/
