Bryndís Rún og Viktor íþróttamenn ársins

Kraftlyftingamaðurinn Viktor Samúelsson úr KFA er íþróttakarl Akureyrar árið 2016 og sundkonan Bryndís Rún Hansen úr Óðni er íþróttakona Akureyrar 2016. Í öðru sæti voru þau Tryggvi Snær Hlinason, körfuknattleiksmaður úr Þór og Hafdís Sigurðardóttir, frjálsíþróttakona úr UFA. Í þriðja sæti voru Valþór Ingi Karlson, blakari úr KA og María Guðmundsdóttir, skíðakona úr SKA.

Kjöri íþróttamanns Akureyrar var lýst í verðlaunahófi á vegum Íþróttabandalags Akureyrar og Frístundaráðs Akureyrarbæjar sem fram fór í Menningarhúsinu Hofi fyrr í dag. 16 aðildarfélög tilnefndu alls 30 íþróttamenn úr sínum röðum. Þess má geta að þetta er í fyrsta sinn sem krýnd eru bæði íþróttakarl og íþróttakona, en sú tímabæra breyting var ákveðin á ársþingi ÍBA síðastliðið vor. Viktor vann titilinn í annað sinn en Bryndís hlaut þennan sæmdartitil í fjórða sinn í dag.

Viktor á langan afreksferil að baki þó hann sé ungur að árum. Hann hefur slegið 211 íslandsmet á ferlinum og 34 standa enn. Hann hefur einning slegið 7 norðurlandamet og á 5 sem standa enn. Hann sigraði öll íslandsmeistaramót ársins á stigum.

Besti árangur 2016 er 357 kg í hnébeygju, 315 kg í bekkpressu og 322,5 kg í réttstöðulyftu

Helstu afrek ársins er gullverðlaun á EM U23 í bekkpressu og silfur á HM U23 í bekkpressu. Hann er áttundi á heimslistanum í sínum þyngdarflokki.

Bryndís hefur undanfarin ár verið í hópi sterkustu sundkvenna landsins. Hún er margfaldur Íslandsmeistari í skriðsundi og flugsundi.

Árið 2016 hefur verið Bryndísi gjöfult. Hún setti nokkur íslandsmet,náði B-lágmörkum fyrir Ólympíuleikana í Ríó. Komst í undanúrslit á EM í London og bætti íslandsmetið sitt í 50 m flugsundi. Á heimsmeistaramótinu í Kanada setti hún tvö íslandsmet og náði inn í undanúrslit á stórbættu íslandsmeti í 50 m flugsundi.

Þetta er í 38. sinn sem íþróttamaður Akureyrar er kjörinn, en það var fyrst gert árið 1979. Alls hafa 21 einstaklingur nú hlotið þetta sæmdarheiti, oftast allra júdókappinn Vernharð Þorleifsson, sjö sinnum.

Heiðursviðurkenning og styrkir vegna landsliðsfólks og Íslandsmeistara

Við sömu athöfn veitti Frístundaráð Akureyrar þremur einstaklingum heiðursviðurkenningar fyrir vel unnin störf í þágu íþrótta á Akureyri.

Aðalheiður Gísladóttir fékk viðurkenninguna fyrir Íþróttafélagið Eik þar sem hún hefur komið að íþróttastarfi fyrir þroskahefta um áratuga bil bæði í stjórn félagsins og sem þjálfari.

Áslaug Kristjánsdóttir fékk viðurkenningu fyrir áratuga starf í þágu Hestamannafélagsins Léttis og ÍBA.

Magnús Ingólfsson fékk einnig heiðursviðurkenningu, en Magnús var einn af brautryðjendum uppbyggingar í Hlíðarfjalli og starfaði mikið fyrir Skíðaráð Akureyrar, kom að byggingu KA heimilisins og hefur líka sinnt miklu og óeigingjörnu starfi í þágu Golfklúbbs Akureyrar.

Þá fengu forsvarsmenn íþróttafélaga á Akureyri afhenta styrki og viðurkenningar vegna Íslandsmeistara og landsliðsfólks úr þeirra röðum á árinu 2015. Íslandsmeistarar úr akureyrskum íþróttafélögum töldust 303 og 101 einstaklingar tóku þátt í landsliðsverkefnum á árinu.

Akureyri handboltafélag                Kristján Orri Jóhannsson
Bílaklúbbur Akureyrar                   Birgir Þór Kristinsson
Bílaklúbbur Akureyrar                   Halldóra Ólafsdóttir
Fimleikafélag Akureyrar                Embla Dögg Sævarsdóttir
Fimleikafélag Akureyrar                Ögri Harðarsson
Fimleikafélag Akureyrar                Guðmundur Kári Þorgrímsson
Golfklúbbur Akureyrar                  Tumi Hrafn Kúld
Golfklúbbur Akureyrar                   Andrea Ýr Ásmundsdóttir
Hamrarnir                                     Andrea Dögg Kjartansdóttir
Hestamannafélagið Léttir               Viðar Bragason
Íþróttafélagið Draupnir                  Alexander Heiðarsson
Íþróttafélagið Þór                         Tryggvi Snær Hlinason
Íþróttafélagið Þór                          Gunnar Örvar Stefánsson
Íþróttafélagið Þór                          Sandra Stephany Mayor Gutierrez
Íþróttafélagið Þór                          Unnur Lára Ásgeirsdóttir
KKA                                             Einar Sigurðsson
Knattspyrnufélag Akureyrar           Valþór Ingi Karlsson
Knattspyrnufélag Akureyrar           Guðmann Þórisson
Knattspyrnufélag Akureyrar            Martha Hermannsdóttir
Kraftlyftingafélag Akureyrar           Viktor Samúelsson
Kraftlyftingafélag Akureyrar            Björk Óðinsdóttir
Skautafélag Akureyrar                    Emilía Rós Ómarsdóttir
Skautafélag Akureyrar                    Andri Már Mikaelsson
Skíðafélag Akureyrar                      Brynjar Leó Kristinsson
Skíðafélag Akureyrar                      María Guðmundsdóttir
Skotfélag Akureyrar                       Grétar Mar Axelsson
Sundfélagið Óðinn                          Bryndís Rún Hansen
Sundfélagi Óðinn                            Snævar Atli Halldórsson
Ungmennafélag Akureyrar               Gunnar Eyjólfsson
Ungmennafélag Akureyrar               Hafdís Sigurðardóttir

Íþróttamenn Akureyrar 1979-2016